Discovery Days
30.09. & 01.10.2023
225 Joer Nationalbibliothéik Lëtzebuerg
Dësen Hierscht feiere mir zesummen den 225. Gebuertsdag vun der Nationalbibliothéik (BnL). Kommt laanscht bei den Discovery Days an erfuerscht d’Schätz vum kulturelle Patrimoine an déi international Sammlunge vun der gréisster Bibliothéik vum Land. Entdeckt och eis grouss Varietéit u Servicer a léiert eng Institutioun kennen, déi den intellektuelle Patrimoine vu Lëtzebuerg zanter méi wéi zwee Joerhonnerte konservéiert an deelt.
Claude D. Conter
Discovery Days
Mir freeën eis, Iech op eis Entdeckungsdeeg ze invitéieren. Mir proposéieren ee Programm mat engem Tour duerch eis Bichermagasénge souwéi engem Discovery Tour duerch de Liessall. Profitéiert dovunner, eis Mataarbechter kennenzeléieren a loosst Iech op inspiréierend Gespréicher mat hinnen an iwwer Theeme wéi Literatur, Konscht, Musek, Kultur a Wëssenschaft.
Fir d’Amateure vum Aussergewéinlechen hu mir e speziellen Highlight virbereet: Sidd bei eise spannende Presentatioune vun de Spezialsammlunge vun der BnL derbäi an entdeckt déi seelen a wäertvoll Dokumenter, déi d’Geschicht vum Land gepräägt hunn.
Dernieft bidde mir och Kuerzfilmvirféierungen an Atelieren un: Léiert wéi een Eisegallus-Tënt hierstellt, Bicher bënnt oder Mangaen illustréiert. Workshops zum Lëtzebuerger Webarchiv, zu eiser Sichmaschinn a-z.lu, eiser Auswiel un digitale Bicher ebooks.lu an eiser VOD-Offer ronnen eisen Eventprogramm of.
Kommt laanscht an entdeckt d’Diversitéit vun der BnL!
Rendez-vous
Sa 30.09.2023 vun 10:00 bis 20:00 Auer
So 01.10.2023 vun 11:00 bis 18:00 Auer
D’Entrée an d’Aktivitéite si gratis. Fir un de Presentatiounen an Atelieren deelhuelen ze kënnen, muss een sech am Viraus umellen.
Programm
Op Entdeckung
Speakers’ Corner
Workshops
Presentatiounen
Spezialsammlunge vun der BnL
Huelt un eisen eenzegaartege Presentatiounen deel, wou mir Iech déi schéinste Stécker aus eise Spezialsammlunge weisen. Al Manuskripter, Inkunabelen, Plakater, Museksarchiven, Kënschtlerbicher an aussergewéinlech Gravuren wäerten hei am Mëttelpunkt stoen. Verpasst also net déi eemoleg Geleeënheet, dës remarkabel Wierker, déi normalerweis nëmmen a gesécherten Magasénger konservéiert ginn, vu ganz no ze bewonneren.
Plaz | Rara-Liessall 1. Stack
| Samschdeg | Presentatioun |
| 10:30 – 11:30 Auer | Ephemera, Affichen, Postkaarten |
| 12:00 – 13:00 Auer | Handschrëften, rar Bicher, Kaarten, Pläng, Vuen |
| 13:30 – 14:30 Auer | Drockgrafiken |
| 15:00 – 16:00 Auer | Bicher a Periodiquen |
| 16:30 – 17:30 Auer | Komponistenarchiven (Cedom) |
| Sonndeg | Presentatioun |
| 11:00 – 12:00 Auer | Drockgrafiken |
| 12:30 – 13:30 Auer | Handschrëften, rar Bicher, Kaarten, Pläng, Vuen |
| 14:00 – 15:00 Auer | Ephemera, Affichen, Postkaarten |
| 15:30 – 16:30 Auer | Komponistenarchiven (Cedom) |
| 17:00 – 18:00 Auer | Bicher a Periodiquen |
MéNuLu-Presentatioun – Médiathèque numérique du Luxembourg (Nach Plaze fräi)
Huelt deel un der Presentatioun vun der Médiathèque numérique du Luxembourg – MéNuLu. Dëse gemeinsame Projet vun der Cité Bibliothèque, dem Centre national de l’audiovisuel an der BnL erméiglecht Iech een Online-Zougang zu enger grousser Sammlung vun Dokumentarfilmer, Serien, Long-Métragen a Kannerfilmer. Egal ob Dir Iech besonnesch fir Long-Métragen oder Dokumentarfilmer begeeschtert, d’MéNuLu bitt Iech eng audiovisuell Offer, déi Dir net verpasse sollt.
Plaz | Konferenzberäich 3. Stack
Samschdeg
11:30 – 13:00 Auer
Sonndeg
14:30 – 16:00 Auer
MéNuLu-Filmvirféierung – Médiathèque numérique du Luxembourg
Nieft de Virstellunge vun eiser MéNuLu VOD-Offer, kënnt Dir Iech an eisem Amphitheater lokal an international Kuerzfilmer ukucken. D’Filmer goufe vum Marc Fritz, Responsabel vun der Mediathéik vun der BnL, suergfälteg ausgewielt.
Plaz | Konferenzberäich 3. Stack
Samschdeg
13:00 – 17:30 Auer
Sonndeg
12:30 – 14:30 Auer
16:00 – 18:00 Auer
Presentatioun vu webarchive.lu (Nach Plaze fräi)
Dës Presentatioun gëtt Iech en Abléck an de Lëtzebuerger Webarchiv a stellt Iech d’Grondlage vun der Webarchivéierung vir. Fannt eraus, wéi Dir dozou bäidroe kënnt, datt d’Lëtzebuerger digital Geschicht net an de Vergiess geréit a fir zukünfteg Generatiounen erhale gëtt.
Plaz | Konferenzberäich 3. Stack
Samschdeg
16:00 – 17:30 Auer
Sonndeg
11:30 – 13:00 Auer
Lëtzebuergesch Musek an der BnL
Entdeckt zesumme mam Patrick Steffen aus dem Cedom (Centre d’études et de documentation musicales) vun der BnL den ëmfangräiche Fong u Lëtzebuerger Musek-CDen.
Plaz | Mediathéik 2. Stack
Samschdeg
11:00 – 11:30 Auer
13:30 – 14:00 Auer
Sonndeg
12:30 – 13:00 Auer
Kommt mir sangen zesummen! De Georgely - Lëtzebuerger Lidderbuch
De Georges Urwald vum Cedom (Centre d’études et de documentation musicales) vun der BnL invitéiert Iech, mat him zréck an d’Vergaangenheet ze reesen an all déi Melodien erëmzeentdecken, déi Är Kandheet gepräägt hunn. Am Lidderbuch De Georgely, dat bei dëser Geleeënheet virgestallt gëtt, fannt Dir all Är léifste Lëtzebuerger Lidder erëm.
Plaz | Museksraum 2. Stack
Samschdeg
14:30 – 15:30 Auer
16:30 – 17:30 Auer
DJ Session – Music & more
Samschdes vun 18:00 bis 20:00 Auer
DJ Ausgeléint, aka Patrick Steffen
Kommt laanscht an erlieft e musikaleschen Owend, bei deem eise Mataarbechter Patrick Steffen alias DJ Ausgeléint aus eisem Museksdepartement (Cedom) fir Iech opleet. Bei dëser Geleeënheet wäert hien eng Auswiel vun den CDen an LPe presentéieren, déi eise Fong ze bidden huet. Entdeckt déi villsäiteg Lëtzebuerger Musekszeen a seng eenzegaarteg Mëschung vu verschiddene Stiler, déi fir all Museksamateur dat Richtegt ze bidden huet. Mir freeën eis op Äre Besuch!
Eng Umeldung ass net néideg.
Feiert mat eis 225 Joer BnL
Als gréisste Bibliothéik vum Land bitt d’BnL eng breet Palette vun Dokumenter a Servicer un. Ob Dir op der Sich sidd no Dokumenter zu de Wëssenschaften, der Literatur oder der Konscht, ob Dir Kultur-, Museks- oder Filmamateur sidd – bei eis fannt Dir ëmmer genau dat, wat Dir sicht. All eis Servicer si gratis a ronderëm d’Auer digital fir Iech disponibel.
Entdeckt déi vilfälteg Méiglechkeete vun der BnL an erlieft d’Faszinatioun vum Wëssen!
Hutt Dir scho vun der Lëtzebuerger Plakat- a Postkaartesammlung héieren? Vläicht sidd Dir och un eiser ikonographescher Sammlung interesséiert? Ausserdeem fannt Dir Graphic Novels a Mangaen am Liessall um Rez-de-Chaussée. Um 2. Stack kënnt Dir déi sëlleg Facette vun der Fotografie, der Architektur an der Konscht kenne léieren. Reegelméisseg organiséiere mir spannend Ausstellungen, déi Iech mat op artistesch Reesen huelen.
Ëmmer um neiste Stand: Zënter méi wéi 20 Joer setzt d’BnL op Digitaliséierung an Automatiséierung, fir souwuel den Zougang zu senge Sammlunge wéi och déi intern Workflowen a Prozesser ze verbesseren. Nieft enger grousser digitaler Offer bedeelegt sech d’BnL un enger Rëtsch vun innovative Projeten an de Beräicher Digitaliséierung vun de Patrimonialsammlungen, Webarchivéierung, Kënschtlech Intelligenz, Datenaustausch, Katalogiséierung a Langzäit-Archivéierung.
D’BnL engagéiert sech dofir, datt Dir zu all Moment Zougang zu den neiste wëssenschaftlechen Erkenntnisser hutt. Egal ob Dir Student, Fuerscher oder ganz einfach vun der Wëssenschaft begeeschtert sidd: d’BnL bitt Iech eng Hellewull un Informatiounen, op déi Dir gréisstendeels och digital zougräife kënnt – z.B. eis Online-Fachzäitschrëften an Datebanken.
Säit hiren Originne sammelt a konservéiert d’BnL de musikalesche Patrimoine vu Lëtzebuerg. De Museksdepartement Cedom ëmfaasst eng beteitend Sammlung vun Toundokumenter, déi sech aus CDen, DVDen, Placken, Kassetten a Tounbänner zesummesetzt. Dernieft iwwerhëlt en d’Funktioun vun engem zentrale Museksarchiv zu Lëtzebuerg, andeems Archiver a Fonge vu Komponisten a Museker gesammelt ginn.
Am Liessall fannt Dir méi wéi 57.000 Dokumenter iwwer Literatur a Sproochen. Souwuel am lëtzebuergesche wéi och am net-lëtzebuergesche Fong, stinn Iech eng ganz Rëtsch digital Ressourcen zur Verfügung.
Entdeckt d’Mediathéik vun der BnL. Hei fannt Dir eng Villfalt vu Multimedia-Inhalter wéi Dokumentarfilmer a Long-Métragen, Lauschterbicher, Musek a Sproochecoursen. Kuckt och eis Video-Streaming-Offer duerch, fir genau déi Filmer ze fannen, déi Dir schonn ëmmer eemol gesi wollt.
Nach net ageschriwwen?
All Persoun iwwer 14 Joer ka sech gratis an der Nationalbibliothéik aschreiwen an déi grouss Auswiel u Servicer notzen. Fir un den Discovery Days deelzehuelen, braucht Dir keng Bibliothéikskaart.